.: 2007

دي شوية ألغاز حسابية جميلة و مش صعبة... أتمنى تعجبكم...

اللغز الأول:

رجل و زوجته.. مجموع عمريهما 91 عام... عمر الزوج حاليا يساوي ضعف العمر الذي كانت عليه زوجته عندما كان هو في مثل عمرها الحالي...

السؤال/ كم عمر الراجل و مراته الآن؟

اللغز الثاني:

من كام سنة سمعت عن سفينة رحلات سياحية غرقت في المحيط الهادي... الناس اللي نجوا من الغرق من حسن حظهم ان كان فيه جزيرة غير مأهولة قريبة من موقع غرق السفينة.. قدروا يوصلوها بقوارب النجاة الصغيرة... و هم كان معاهم غذاء يكفي الـ 220 راكب اللي نجوا لمدة ثلاثة أسابيع...

بعد ست ايام... الناس اللي على الجزيرة شافت سفينة إنقاذ جاية ناحيتهم... فرحوا قوي... بس للأسف سفينة الإنقاذ غرقت هي الأخرى.. (يا دي المصيبة :))... و بالتالي طاقم السفينة الـ 55 بقوا محجوزين هم كمان في الجزيرة مع البقية (جبتك يا عبدالمعين تعينني :))...

أخواننا اللي على سفينة الإنقاذ جايين بإيديهم فاضية... معهمش لا كيلو منقة و لا صينية بطاطس.. و لا حتى بونبوناية واحدة... و طبعا دلوقت هيشاركوا في استهلاك الطعام الموجود... و بالتالي الموضوع يستدعي إعادة التحصيص...

اتفق الجميع على ان الحصة الجديدة لكل واحد تساوي نصف الحصة اللي كانت مخصصة سابقا قبل ما تغرق سفينة الإنقاذ...

السؤال/ إبتداء من يوم غرق سفينة الرحلات السياحية، كمية الأكل تكفي لكم يوم؟

اللغز الثالث:

عندنا مبنى على شكل مكعب... في كل دور يوجد مجموعة من الغرف المتشابهة و برضه الغرف على شكل مكعبات... كل غرفة فيها أربع أبواب (باب في كل حيطة)... و عندنا 588 باب مشترك بين الغرف...

السؤال/ كم عدد الغرف في المبنى؟

اللغز الرابع:

من أسبوع.. محل الحلويات اللي على ناصية الشارع عمل افتتاح كبيييير.. أنا ما بحبش الزحمة... و عشان كده ما رحتش الإفتتاح... بس كل الناس بتتكلم عن طعامة الحلويات اللي عنده... يوم من الأيام أخذت بعضي و رحت للمحل.. و قلت لازم أذوق... لما دخلت المحل لقيت مكتوب انهم بيبيعوا حلوياتهم بطريقة غريبة...يعني ما فيش حاجة عندهم اسمها بيع بالكيلو... يا إما تشتري 6، أو 9، أو 20 كيلو... أو مضاعفات الأعداد دي... أما محل غريب بصحيح... طبعا أنا ما اشتريتش حاجة.. يعني هآخذ 6 كيلو أعمل بيهم أيه؟!!

<== مش عارف الأخ ده مكان مناسب هنا و الا لا :)

و أنا في طريقي للبيت قعدت أفكر في طريقة الوزن الغريبة اللي في المحل... و بأسأل نفسي... أيه هو أكبر وزن ما يقدرش المحل يوفره بطريقة الوزن بتاعتهم...

السؤال/ ما هو أكبر وزن لا يمكن الحصول عليه عن طريق مجموعات الـ 6، 9، و 20 كيلو؟

اللغز الخامس:

نرجع لموضوع المكعبات... عندنا مكعب من الجبن... مقسم إلى 27 مكعب صغير (و لكن المكعبات الصغيرة لا زالت مرصوصة بحيث لا زالت تكوّن المكعب الكبير)... جبنا فأر و خليناه يبدأ ياكل المكعب الكبير من أحد الأركان... و الفار كل ما يخلص مكعب صغير ينقل على اللي جنبه... بس الفار ما يقدرش ينقل إلا لمكعب ملاصق للمكعب اللي لسه واكله...

السؤال/ بفرض أن الفار جيعان جدا و مفجوع على الأكل و مش هتجيله تخمة... هل يستطيع الفأر أن ينتهي بأكل المكعب الصغير اللي يقع تماما في وسط المكعب الكبير؟
يمكن ده مش لغز حسابي قوي... إنما فيه شوية حساب و لذلك إتحط ;)

تحياتي للجميع